කාවාඩි නර්තනය

                             දෙවියන් පිනවන කාවාඩි නර්තනය.

 දේව විශ්වාසයන් හා අභිචාර විධියක් ලෙස කාවඩි නර්තනයට පසුබිම නිර්මාණය වීම

කාවඩි නර්තනයේ ප්‍රධාන දේව විශ්වාසය බැඳී පවතින්නේ මුහුණු සයක්,අත් දොළසක්,රන්වන් සිරුරක් හෙබි රණමයුරකු පිට නැගී සැමවිටම ජයග්‍රහණයේ සීනු සහ කොඩි දරණ ජනතාව අතර බෙහෙවින් ජනප්‍රිය ස්කන්ධ කුමාර හෙවත් කතරගම දෙවියන් සමගය.ඉන්දියාවේ සුබ්‍රමනියම්,මුරුගන් ආදී ලෙසත් ලංකාව තුළ කඳ කුමරු,ස්කන්ධ දිව්‍යරාජ ලෙසත් පිදුම් ලබයි.මහා වංශයට අනුව වාසභවන කාජරගාම හෙවත් කතරගම වන අතර කහ කුරුලු සන්දේශය සහ රොබට් නොක්ස් වාර්තා අනුව වැඩිහිටි කන්දේ පැවැති ස්කන්ධ කුමාර දෙවොල මැණික් නදිය අසබඩ 18 වන සියවසේ ඉදිකොට ඇත.ශ්‍රී ලංකාවේ මධ්‍යතන යුගයේදි බුදු සමය සමඟ මිශ්‍රවීමෙන් දියුනුවට පත් දේව විශ්වාසයන් හේතු කොට ගෙන දිවයිනේ විවිධ ප්‍රදේශ වල දෙවොල් ඉදිවූ අතර කතරගම දෙවි උදෙසාද ගඩලාදෙණිය, ලංකාතිලක, ඇම්බැක්කේ, අලුත්නුවර ආදී ස්ථානවල දෙවොල් ඉදිවී ඇත.

මෙසේ දේව විශ්වාසයන් සමඟ බැඳුණු අභිචාර ලෙස විවිධ චාරිත්‍ර පුද සිරිත් ශ්‍රී ලංකාව තුළ ඇති වූ අතර පුද්ගලයන්ගේ කායික මානසික ව්‍යාධි වල සිට ඉටු කරන සියලු සුබ කාර්ය වලදී කතරගම දෙවි විෂයෙහි භාරහාර වීම තුළින් එකී කටයුතු ඉටු වන බවට තරයේ විශ්වාස කරන වැසියන් රෝහණ දේශයට අධිපති කතරගම දෙවි උදෙසා පුද සිරිත් ඉටු කිරීම කරන්ට විය. එහි ප්‍රතිඵලයක් ලෙස කප් සිටුවීම, ගිනිපෑගීම ,දිය කැපීම වැනි පුදසිරිත් ආරම්භ වූ අතර කාවඩි නර්තනය යනු එවැනිම දෙවියන් විෂයෙහි ආරම්භ වූ පූජා නර්තනයකි.රෝහණ දේශයට අධිපති කඳසුරිඳු උදෙසා පවත්වනු ලබන ඇසළ උත්සවයේ කාවඩි නැටුමට සුවිශේෂි ස්ථානයක් හිමි වන අතර කතරගම දේවාලයේ වාර්ෂිකව පැවැත්වෙන උත්සවයන් අතර ඉතාම විසිතුරු වූත් අති විශාල පිරිසකගේ සහභාගිත්වය ලබන්නා වූත් ඇසළ මංගල්‍යය තුළ ඉන්දීය සම්භවයක් සහිත ආගමික භක්තිය පෙරදැරිව ඉටුකරන ද්‍රවිඩ ගැමි නැටුම් විශේෂයක් වන කාවඩි නර්තනය වැදගත් වී ඇත .දැඩි දේව භක්තියකින් සිදු කරන මෙම නර්තනය දේවාල පුද සිරිත් අතර විශේෂ තැනක් හිමිකර ගනී.මේ අනුව කාවඩි නර්තනය කතරගම දෙවියන් වෙනුවෙන් කරන පූජා නර්තනයක් ලෙස වැදගත් වන අතර එය භක්ති නර්තනයක්ද වේ. කාවඩි ආට්ටම් ලෙසද හැඳින්වෙන කාවඩි නර්තනය කාව හා තඩි යන වචන ද්විත්වයෙන් සෑදෙන කාව තඩි යන්නෙන් බිඳී කාවඩි නර්තනය යන්න සැදී ඇත.

› කාවඩි නර්තන උපත

දේව කතා ඉතිහාසයේ කාවඩි උපත පිළිබඳ ව අපූරු රසවත් තොරතුරු සඳහන් ව තිබේ.එහි එන කතා පුවතකට අනුව ඈත පුරාණයේ දෙවියන් සහ අසුරයන් අතර පැවතියේ යැයි කියන මහා සටනේ දී කඳ කුමකුමරු අදින් අන්ත පරාජයට පත් සුරපද්ම නම් අසුර නායකයා පණ බේරා ගැනීම සඳහා පලාගොස් සැඟවී ගත්තේය.මෙම සුරාසුර යුද්ධයේදී සුරපද්මට පරාජය හිමිවූයේ ඔහුගේ සේනාධිනායක හිඩම්බේශ්වරගේ වරදින් බව සැක කළ අසුරයෝ ඔහු අල්ලා මරා දැමිය යුතු යැයි තීරණය කළහ. මේ  බව දැනගත් හිඩම්බේශ්වර මහා බලසම්පන්න අගස්ති නම් ඍෂිවරයා ළඟට දිව ගොස් දණින් වැටී වැඳ නමස්කාර කොට තමා මරණින් ගලවා ගන්නා ලෙස ඇයද සිටියේ ය.ඊට කන් දුන් අගස්ති සෘෂිවරයා ඔහු මරණින් බේරා ගැනීමට නම් 'ශිව ගිරි' සහ 'සප්ත ගිරි ් කඳු පර්වත දෙක රැගෙන විත් තමා ඉදිරියේ තබන ලෙස හිඩම්බේශ්වරට පැවසීය.අගස්තිගේ නියාමය පරිදි තම පණ බේරා ගැනීමට කඳු දෙක රැගෙන ඒම සඳහා ඔහු එවෙලේම පිටත්ව ගියේය. එහෙත් ඔහුට වැඩි දුරක් යාමට නොලැබුණි. සාමාන්‍ය පිරිමි ළමයකු ලෙස වෙස් වලාගෙන මග රැක සිටි කඳකුමරු විසින් හිඬත්කේශ්වර ජීවග්‍රහණයෙන් අල්ලා මරා දැම්මේය. ඒ අපරාධය සැලව කඳ කුමරුට දඬුවම් කිරීමට නොහැකි බැවින් උරණ වූ අගස්ති වහා එතැනට පැමිණ හිඩම්බේශ්වරට නැවත ප්‍රාණය ලබා දුන්නේය. යළි පණ ලැබීමෙන් මහත් සතුටට පත් හිඩල්කේශ්වර වහා දුව ගොස් කඳු පර්වත දෙක ගෙනැවිත් කරපිට තබාගෙන අගස්ති ඉදිරියේ නටන්නට පටන් ගත්තේය. එදා 'ශිව ගිරි' හා ‛සප්ත ගිරි ් කඳු කර පිට රඳවාගෙන හිඩම්බේශ්වර කළ රංගනය පසුව කාවඩි නර්තනය ලෙස කතරගම දෙවියන් ඉදිරියේ සිදුකරන බව ජනප්‍රවාදයේ සඳහන් වේ.

> කාවඩි නර්තනයේ හින්දු ආභාෂය සහ නව මුහුණුවර

ප්‍රතිපත්තියක් වශයෙන් දෙවියන් සතුටු කිරීම සඳහා ශරීරයට දුම්දීම 'අත්තකිලමථානුයෝගය"  හින්දු භක්තිකයෝ මහත් ඉහළින් අගය කරති.මේ පිළිගැනීම පදනම් කරගනිමින් ගොඩනැගුණු එබඳු දේව පූජා විධි අතර කාවඩි නර්තනය වැදගත් වේ.අතීතයේ දී කුලීනයන්ට පමණක් සීමා වූ මෙම පූජා විදිය කලකදී ඉතා ඉහළින් සැලකුණ පංචමාකාර පූජා විදියෙන් එකකි.මෙහිදී අන් නර්තනයන් මෙන් ස්ත‍්‍රී පුරුෂ භේදයක් දක්නට නොලැබෙන අතර දෙපාර්ශවයම රඟදක්වනු ලැබේ.

මෙසේ හින්දු ආභාෂයෙන් ස්කන්ධ කුමාර දේව ඇදහීමත් සමග ශ්‍රී ලංකාවට ඉන්දීය සම්භවයක් සහිත ව පැමිණි කාවඩි නර්තනය වර්තමානයේ නව මුහුණුවර ගත් විට ජාති ආගම්,කුල ආගම් වැනි කිසිත් භේදයක් නොසලකා සංස්කෘතික ඝට්ටන වලින් තොරව සියලු දෙනාම පාහේ නර්තනයේ යෙදීම සහ එය රස විඳීම දැකිය හැකිය.මුල් කාලීනව දෙවියන් පිදීම යන සංකල්පයට වඩා අද වන විට සංගීත රසයෙන් හෙබි ප්‍රේක්ෂකයන් පිනවන විනෝදජනක නර්තනයක් ලෙස වර්ධනය වී ඇත.නව මුහුණුවර තුළද ස්ත‍්‍රී පුරුෂ දෙපාර්ශවයම නර්තනයේ යෙදීම දැකිය හැකි අතර පැරණි කාලයට වඩා කාවඩි නර්තනය සදහා යොදා ගන්නා සංගීතය, රංග වස්ත්‍රාභරණ,කාවඩි කූඩුව ආදියෙහි වෙනස්වීම් සහ ප්‍රවණතාවයන් මතුවී ඇත.

> කාවඩි නර්තනයේ හදවත

කාවඩි කූඩුව

කරගන්නා කාවඩි නැටීමේදී උපයෝගී මෙවලම වන 'කාවඩි කූඩුව සම්මත පිළිවෙලකට තනා ගනියි.අඩි හතරත් පහත් තරම් දික් වූ සැහැල්ලු ලීයක් ආරුක්කුවක හැඩයට නවා එහි දෙකෙළවර ට හරස් ලියක් සවි කර ගනු ලැබේ.ඉන්පසු කාවඩි කූඩුව රංගනයේ යෙදෙන බැතිමතුන්ට අවශ්‍ය පරිදි නොයෙක් වෛවර්ණ සැරසිලි ක්‍රම යොදා අලංකාර කර ගනී.මේ සඳහා රතු

 නිල් කහ තැඹිලි, දම් වැනි තද වර්ණ රෙදි කැබලි හෝ එවැනි ම වර්ණ සහිත කඩදාසි වර්ග. ඉටි කොළ බහුල වශයෙන් යොදා ගැනේ. විශේෂයෙන්ම තද රතු වර්ණය උපයෝගී කර ගැනීම කාවඩි නිර්මාණකරුවෝ අමතක නොකරති. කතරගම දෙවියන් හට හිමි වර්ණය රතු පාට බැවින් කාවඩි සැරසිලි වලට ද රතුපාට වැඩිපුර යොදා ගන්නා අතර අලංකාර බව වැඩි කිරීම සඳහා නොයෙක් වර්ණ කොඩි සහ කුඩා ගෙජ්ජි වැල් එල්ලනු ලැබේ. කාවඩියට දර්ශනීය මොනර පිල් යොදා ගනු ලැබීම සුවිශේෂී වන අතර කතරගම දෙවියන් හට අයත් මයුරාසනයේ මොණරා සංකේතවත් කිරීමට කාවඩියට මොනර පිල් එක් කරන බව සඳහන් වේ.කාවඩි කුඩුව නිර්මාණය සඳහා භාවිතා කරන දැව වර්ග වනුයේ කොස්, කෝන්, බෝ, සුදු හඳුන්, පුවක් ආදී වර්ගයි.කාවඩි කුඩුව තුළ කතරගම දෙවියන්ගේ සහ ගණ දෙවියන්ගේ රූප යොදා ගනු ලබන අතර මොනර පිල් මුළු හතරට 7 බැගින් යොදා අලංකාර කර ගනු ලබයි.මෙම කුඩුව සෑදීමේදී තඹ සහ පිත්තල ඇණ පමණක් භාවිතා කරයි. පොදුවේ කාවඩි කුඩුවක් නිර්මාණය කිරීම සහ සැරසීම මේ ආකාරයෙන් සිදු වුවද විවිධ කාවඩි ප්‍රභේදයන් පවතින නිසා එම ප්‍රභේදය ට අනුව මෙම කාවඩි සැකසීමේ සම්මත පිළිවෙලවල් වල ඇතැම් සුළු වෙනස්කම් ඇතිවීම සිදුවිය හැකිය.

> කාවඩි වර්ග

පරවි කාවඩි, භක්ති කාවඩි, ගිනි කාවඩි,කිරි කාවඩි, මත්ස්‍ය කාවඩි ආදී ලෙස කාවඩි වර්ග කිහිපයකින් කාවඩි නර්තනයන් ප්‍රධාන වශයෙන් වර්ග කරයි.

පරවි/ පරවා කාවඩි

කෙළවර ලෝහමය කොකු සමූහයක් අට්ටාලයක මතින් පහළට වැටුණු කඹයක වෙයි. බැතිමතා ලී තට්ටුව මත මුනින් දිගා වූ පසු ශරීරයෙහි තැනින් තැන කොකු අමුණයි. අනතුරුව ක්‍රම ක්‍රමයෙන් කඹේ ආධාරයෙන් ඉහළට ඔසවයි. අනතුරුව කොකුවලින් එල්ලෙන ශරීරය නිදැල්ලේ පැද්දෙමින් ප්‍රදර්ශනය කරයි.කරත්තයක මුදුනෙහි කාවඩිය තබා ඉන්පසු ඉන් පහළට එල්ලෙන නූල් කීපයක කෙලවරේ ඇති කොකු වලින් සම සිදුරු කරගෙන පරවි කාවඩිකරු නැතිනම්  මුරුගන් භක්තිකයා නිවසේ සිට කෝවිල කරා කොකු මතින් එල්ලී පැමිණ කෝවිල් ද්වාරය අසල දී පොල් ගෙඩියක් පොළවේ ගසන අතර ඉන්පසුව කරත්තය මුදුනෙහි තැන්පත් කර ඇති කාවඩිය කරෙහි තබාගෙන කෝවිල වටා ගොස් මුරුගන් දෙවියන් වන්දනා කරයි.මෙම නැටුම් වල යෙදෙන අයගේ සිරුරේ අවයව කොටස් දැඩි ලෙස වධ බන්ධනයට ලක් කරන අතර දිව මුඛයෙන් පිටතට ඇද කටු ගසා ගෙන නටන අතර තවත් කෙනෙකු දෙකම්මුල් පසාරු වී යන ලෙස උල් කටු ගසා ගනිමින් කාවඩි රංගනයේ යෙදේ. නැතහොත් කරත්තය හෝ ට්‍රක් රථයක සවිකල කණු දෙකක පොල්ලක් බැද කාවඩි නටන්නාගේ පිටේ යකඩ කොකු අමුණා වටේ කරකවයි.නාස් වල සහ සම සිදුරු වන සේ

කටු ගසා ගෙන මොවුන් නර්තනය කරන අතර මස් මාංශ සහ සුරාවෙන් වැළකී ඔවුන් මෙම කටයුත්ත සඳහා සහභාගි වේ.කිලි කුණු වලින් තොරව පිරිසිදුව දින ගණන් පේවී දේවාශිර්වාදය ලබා ගැනීම මෙහිදී වැදගත් වන අතර දේව විශ්වාසය නිසා සිරුරට වේදනාවන් ඇති නොවේ. දේව හාස්කමක් ලෙස බැතිමතුන් මෙය විශ්වාස කරන අතර පරවා කාවඩි නැටීමෙන් පසු ශරීරයේ සිදුරු වූ තැන් වල තින්නරු කුඩු විශේෂය ගල්වයි.මෙම කුඩු වර්ගය "තින්නෝරු" යනුවෙන්ද හැඳින් වේ. තින්නෝරු කුඩු තුවාල මත ආලේප කළ සැණින් සියලුම ලප කැලැල් සුව වී වියළී මැකී යනු ලබන අතර එහි ඇති අගනා ඖෂධීය ගුණය එයින් පෙන්නුම් කරයි.මෙම පරවා කාවඩි නර්තනය ඉතාමත් ත්‍රාසජනක සහ බිය ජනක අවස්ථාවක් වන අතර මෙහිදී නිරූපණය කරන්නේ ශෘංගාරාත්මක හෝ රිද්මයානුකූල චලන නොව ඉතාමත් බියජනක කැරකවීම්, දෙපසට පැද්දීම් වැනි චලන වේ. බොහෝ විට මෙම අවස්ථාවට මුහුණ දෙන පුද්ගලයා ඔවුන්ගේ දෙඅත් වලින් වැඳීම් වැනි චලන සිදු කිරීම දැකිය හැකිය.

භක්ති කාවඩි

දේව භක්තිය කුළුගන්වන පූජා ක්‍රමයකි. එය අසුර සංහාර දිනය, ස්කන්ධ කුමාර උත්පත්තිය , වල්ලි මාතාව විවාහ කර ගත් දිනය ආදී සිදුවීම් නිමිති කරගෙන පවත්වනු ලබයි.

මුරුගන් කාවඩිය යන නමින් ද මෙය හඳුන්වන අතර ඉතා විශාල ලෙස මෙම කාවඩිය සකස් කරයි. කොස් හා සඳුන් දැව වලින් නිර්මාණය කරන අතර මෙම කාවඩිය නටන පුද්ගලයා ශක්තිවන්ත අයකු විය යුතු වේ.මෙම කාවඩියේ මොනර පිල් රැසක් ගසා ඇති අතර බර අතින් ද වැඩිය.සෑම වසරකම අසුර සංහාරය සිදු වූ ඉල් මහා මංගල්‍ය දිනය දේව සේනාපති තනතුරු ගත් වෘශ්චික රවියේ කැති නැකත යෙදෙන දිනය. උපන් දිනය වන මකර රවිගේ කැති නැකත යෙදෙන දිනය හා කතරගම දෙවිඳුන් වල්ලි මාතාව සමග විවාහ වූ බක් මහ උත්‍රපල් නැකත යෙදෙන දිනය යන දිනවල භක්ති කාවඩි පූජා පැවැත්වේ.

ගිනි කාවඩි

විශේෂ සැරසිලි කිහිපයකින් සමන්විත මෙම කාවඩි කුඩුව අලු කෙසෙල් පතුරු සහ ගොක් කොළ වලින් සරසා මුළු හතරට මොනර පිල් 7 බැගින් යොදයි. අනතුරුව නාග පෙණ ආකාරයෙන් සැකසූ ගිනි පන්දම් වලින් සරසා සිරුර පුරා රිදියෙන් සැකසූ වේලායුධ එකසිය අටක් ගසා ගනු ලබයි දේවාලයේ පහන් දැල්වීම හා සැබැදි කාවඩි පූජාවකි. දැල්වෙන කාවාඩි කූඩුව කර තබාගෙන නටමින් දේවාලයට ගමන් කර එහි ඇති පහන් තම පන්දම් ම්වලින් දල්වයි. මෙම කාවඩිය නැටීම තරමක් අපහසුය. පසුව පහන් දල්වා පිටේ බැඳ මෙම කාවඩි රංගනයේ යෙදෙති.

කිරි කවඩි

කළු පැහැ කිරි එළදෙනක් සිය පැටවාද සමග ගෙන මනාව නහවා මල් මාලා වලින් සරසා සුවඳ දුම් අල්ලා පිරිසිදු කරගෙන කිරි දොවා ගනු ලැබේ. දොවාගත් කිරි පිරිසිදු මුට්ටි වලට දමා කට බැඳ කාවාඩි කුඩු දෙපස එල්ලනු ලබයි. ඉන්පසු ජනතාවට ආශිර්වාද ආශිර්වාද කිරීමට කිරි කවඩි නර්තනය  කරනු ලබයි.මෙම කිරි පිත්තල මුට්ටියකට දමා කාවාඩි කාවඩිය දෙකේ ැකක් නර්තනය කරනු ලබන අතර මෙම කාවඩිය නැටීම සිදු කරනු ලබන්නේ දරුවන් ලෙඩ වූ විට හා දරු ඵල ලබා ගැනීමට පෙර දෙවියන්ට සිදු කරනු ලබන බාරහාර ඔප්පු කිරීම වශයෙනුයි.මෙම සෙම්බු වල පුරවන ලද කිරි ඉතිරී විසිරී ගොස් රැස්ව සිටින බැතිමතුන්ගේ ඇඟට වැටුණේ නම් ඔවුන්ට දේවාශීර්වාදය ලැබෙන බව විශ්වාස කරයි.දවස පුරා නැටුවද කිරි විසිරී ගියද සෙම්බු වල පිරවූ කිරි කිසිදු අඩුවක් නොවන බව ඔවුන්ගේ පිළිගැනීම වන අතර කඳ සුරිඳුගෙ දේව බලයෙන් හා හාස්කම් නිසා එය සිදුවන බව විශ්වාසයයි.

මත්ස්‍ය කාවාඩි

බැතිමතුන් විශ්වාස කරන්නේ පිසු මසුන් අධික දේව භක්තියට අනුව යළි පණ ලබා දියෙහි පිනා යන බවය. පිළිගත නොහැකි සිද්ධීන් ගෙන් යුත් නාමමාත්‍ර පූජා විශේෂයක් වශයෙන් මත්ස්‍ය කාවඩි හැඳින්වෙයි. මෙය වර්තමානයේ භාවිතයෙන් තොර ක්‍රමයකි. මාලු ව්‍යාංජනයක් සහිතව මුට්ටි කාවාඩි කූඩු වල එල්ලාගෙන ගමේ ඇවිද දේවාලයට පිවිසෙන බැතිමතා එම කාවාඩි කූඩුව ජලයන් නහවා මුට්ටි කටවල් විවෘත කරයි. එවිට පිසූ මාළුවන්ට පණ ලැබී ඇති බව දැකිය හැකිය. මෙම කාවඩි නර්තන ක්‍රමය අභාවයට ගිය පැරණි පූජා ක්‍රමයකි.

> කාවඩි නර්තනයට යොදා ගන්නා සංගීතය

පුරාණයේ කාවාඩි නැටුම සඳහා සංගීතය සපයා ගැනීමට දෙමළ බෙරය,පන්තේරුව,උඩැක්කිය,තාලම්පට,රබාන වැනි තූර්ය භාණ්ඩ යොදා ගනු ලැබුවද වර්තමානය වන විට එම මූලික ගුණාංග වලින් කාවඩි නර්තන සංගීතය බැහැර වී ඇත.අද වන විට කාවඩි නර්තන සංගීතය සංගීත සත්සරණයක් බවට පත්වී ඇත.නූතන කාවඩි නැටුම සඳහා පෙරදිග සංගීත භාණ්ඩ මෙන්ම බටහිර සංගීත භාණ්ඩ ද යොදා ගැනීම දැකිය හැකිය.මෝලම් සංගීතය කාවඩි නර්තනයේ හදවත බඳු වන අතර ඉහත සාකච්ඡා කළ කවර කාවඩි නර්තනය කදී වුවද මෝලම් සංගීතය අත්‍යවශ්‍ය වේ.මෝලම් කරුවන්ට දකුණු ඉන්දීය සම්භවයක් පවතින අතර ලාංකීය තුළ සිදු වූ බව හා විවාහ සම්බන්ධතා මත මෝලං කරුවන් දමිළ සිංහල මිශ්‍ර ආදී ලෙස අද වන විට සිටී.අද වන විට මෝලම් කරුවන් කාවඩි නර්තනය සඳහා ම කණ්ඩායම් නිර්මාණය කරගෙන සිටින අතර බොහෝ විට කවිට කණ්ඩායම් වලට තුනත් පහත් වැනි පිරිසක් සිටීම දැකිය හැකිය.ඔවුන් රස්සාවක් වශයෙන් ද ඇතැම් අවස්ථාවල කාවඩි නර්තනය සඳහා සංගීතය සැපයීම සිදු කරනු ලැබේ.මුල් කාලීනව ආගමික භක්තියෙන් යුතු වාදන වලට අනුව කාවඩි නර්තනය සිදු වුණත් අද වන විට වේග රිද්ම ගීත වලට අනුව තනු වාදනය කිරීම කාවඩි නර්තනය අවශ්‍ය එහි දැකිය හැකිය.වර්තමානයේ දී කාවඩි නර්තන සංගීතය තුළ දෙමළ බෙරය,තාලම්පට,සයිඩ් ඩ්‍රම්,ට්‍රම්පට් යන සංගීත උපකරණ වැදගත් වී තිබේ.

කාවඩි නර්තන රංග වස්ත්‍රාභරණ

කාන්තා හා පිරිමි යන දෙපාර්ශ්වයම සඳහා යොදා ගන්නා රංග වස්ත්‍රාභරණ වල දකුණු ඉන්දීය සම්භවය සහිත ස්වභාවය දැකිය හැකි වේ. එමෙන්ම මෙම රංග වස්ත්‍රාභරණ සදහා යොදා ගන්නා වර්ණ තද විචිත්‍ර වර්ණ වන අතර රතු, තැඹිලි,කොළ, නිල් ආදී වර්ණ වලට මූලිකත්වය දී තිබීම දැකිය  හැකිය. එමෙන්ම ආභරණ පැළඳීම සුවිශේෂී වන අතර පිරිමි පාර්ශවය බොහෝවිට උඩුකය නිරාවරණව යටි කයට දෝති ආකාරයේ ඇඳුම් කොටසක් හැඳීම සිදු කරනු ලැබේ. පයට ගෙජ්ජි පැළඳ කරට මල් මාලා පැළඳීම දැකිය හැකි වේ. නළලට තිලක තබා සිටීම ද දැකිය හැකිය. ස්ත්‍රී පාර්ශවය ගේ ඇඳුම් පැළඳුම් වල වෙනස්කම් දැකිය හැකිය.සාරිය,උඩුකයට හැට්ටය, යටි කයට දිගු සාය, පපු ප්‍රදේශය වැසෙන සේ ඉන වටා කරකවා දමා දමා ගන්නා සළුව ආදී ඇඳුම් පැළඳුම් ස්ත්‍රී කාවඩි නර්තන ආශ්‍රිතව දැකගත හැකිය. කාන්තාවන් ද පයට ගෙජ්ජි පළඳින අතර කරට මාල,කනට තෝඩු,හිසට මල් පැළඳීම, නළලට තැල්ලක් සහ තිලක තැබීම දැකිය හැකිය.

කාවඩි නර්තන චලන වල සුවිශේෂීතා

කාවඩි නර්තනය අවස්ථානුකූලව වෙනස් වේ.සාමාන්‍ය කාවාඩි නර්තනයක දී යොදා ගන්නා චලන රිද්මයානුකූල බවකින් යුතු වන අතර නර්තනයේදී අනිවාර්යෙන්ම කාවඩි කුඩුව භාවිත කළ යුතුය. බොහෝ විට කාවඩි කුඩුව ආශ්‍රයෙන් එය හිස මත උරහිස අතර විවිධ ආකාරයට හසුරුවමින් චලන මැවීමට උත්සාහ කරන අතර කාවඩි මෝලම් සංගීතයේ වේගවත් බව සමඟ වේගවත් ශක්ති ජනක ලෙස ශරීරය හැසිරවීම සහ චලන වලට යාම දැකිය හැකිය. නමුත් පරවා වැනි කාවඩි වලදී නර්තකයන්ට චලන හැසිරවීමට සිදුවන්නේ අවකාශය තුළය. මෙහි දී නර්තකයන් ට නර්තනයකට වඩා කැරකීම්, ඉහල පහල යාම දෙපසට වැනිම ආදිය සිදු කිරීමට සිදුවන අතර අත්වලින් වැදීම් වැනි සරල චලන හැසිරවිය හැකිය. භක්ති කාවඩි නැටීමේදී ද විශාල ශක්තියක් අවශ්‍ය වන අතර නර්තනයේදී කාවඩිය සමබර කර ගැනීමද වැදගත් වේ. එසේම ගිනි කාවඩි නැටීමේදීද සමබරතාවය, ඉවසීම වැදගත් වේ. කිරි කාවඩි නැටීමේදී නර්තන චලන වලට වඩා භක්තියෙන් යුතුව ඇවිද යාම දැකිය හැක. මත්ස්‍ය කාවඩිය අද වන විට අභාවයට ගොස් ඇත.කාවාඩි නර්තනයට නිශ්චිත වූ අත් පා හැසිරවීමක් නොමැති නිසා නිදහස් ආරකින් යුතුව නායකයා ගේ අභිමතය පරිදි ඉදිරිපත් කළ හැකි නර්තනයක් වන මෙය ඇතැම් අවස්ථාවල දෙවියන් ආරූඪ වූ විලාශයක් නර්තන වල මූර්තිමත් කරයි. දකුණු ඉන්දීය ආභාෂය සහිත ද්‍රවිඩ ගැමි නැටුමක් ලෙස සුවිශේෂී වන මෙය ස්ත්‍රී පුරුෂ භේදයකින් තොරව රඟදැක්වීම දැකිය හැකිවේ.මෙසේ ස්ත‍්‍රී පුරුෂ ස්ත‍්‍රී පුරුෂ දෙපාර්ශවයම රඟ දක්වන නිසා කාවඩි නර්තනය සඳහා යොදා ගන්නා චලන වල ලාස්‍ය,තාන්ඩව යන ලක්ෂණ දෙක ම දැකිය හැකි අවස්ථා තිබිය හැකි ය.කතරගම දේවාශිර්වාදය ආරක්ෂාව,සාන්තිය ලබන්නට මෙම චලන හසුරුවා කාවඩි නටන අතර මුල් කාලයේ හින්දු ආගමේ ප්‍රධාන පූජාවක් වූ අතර අද වන විට සිංහල දමිළ සංස්කෘතික බේද නැතිව නර්තනය කරනු ලබන නර්තනයක් වේ.කෙසේ වෙතත් කාවඩි නර්තනය ට අනන්‍ය වූ නීති මාලාවක් හෝ නර්තන අංගහාර මෙහෙය වීමක් හෝ නිශ්චිත වශයෙන් නොමැති නිසා පුද්ගලයන්ට අනන්‍ය වූ රිසි චලන හසුරුවමින් ඉදිරිපත් කරන රිද්මයානුකූල සුන්දර නර්තනයක් ලෙස කාවඩි නර්තනය හැඳින්විය හැකිය.

කාවඩි නර්තනය සිදු කරන අවස්ථා

• විශේෂයෙන්ම රුහුණු දේශයට අධිපති කඳසුරිඳු උදෙසා පවත්වන ඇසළ උත්සවයේ කාවඩි නර්තනය අනිවාර්ය අංගයකි.කතරගම පෙරහරේ පෙරහැරේ අනිවාර්යම අංගයකි.
• විවිධ බාරහාර කඳකුමරු විෂයෙහි ඔප්පු කිරීමේදී කාවඩි නර්තනය සිදු කරයි
• විනෝදය සදහා කාවඩි නර්තනය කරයි. උදාහරණ ලෙස විවිධ ප්‍රසංග, සංස්කෘතික උත්සව ආදිය
• මුන්නේශ්වරම් දේවාලය,දෙවිනුවර උපුල්වන් දේවාලය,ගැටබරු දේවාලය, රත්නපුර සමන් දේවාලය, සීනිගම දේවාල පෙරහැර ආදියේද කාවඩි නර්තනය දැකිය හැකිය.
• යාපනයේ කෝවිල් ආශ්‍රිතවද කාවඩි නර්තනය සිදුවේ.

කාවඩි නර්තනයේ පවතින ගැටලු සහ කාවඩි නර්තනය අනාගතය

• කාවඩි නර්තනය අද වන විටත් සීමා වී තිබෙන්නේ දේවාල ආශ්‍රිත ව සහ පෙරහැර ආශ්‍රිතව වේ.
• 
  
• එමෙන්ම කාවඩි නර්තනයේ පවතින සංස්කෘතිමය අනන්‍යතාවයන් ටිකෙන් ටික අද වෙන විට ගිලිහී යමින් පවතී.උදාහරණයක් ලෙස මේ වන විටත් මත්ස්‍ය කාවාඩි වැනි ප්‍රභේදයන් අභාවයට ගොස් ය.
• 
  
• කාවඩි නර්තනයේ යෙදී සිටින පුද්ගලයන් සහ එයට සංගීතය සපයන පුද්ගලයන් ආර්ථික තත්ත්වයන් මත වෙනත් රැකියා සඳහා යොමු වීම ගැටලුවක් බවට පත්වී ඇත.
• 
  
• දෙවියන් විෂයෙහි පැවතුණු කාවඩි නර්තනය විනෝදය විෂයෙහි යොදා ගැනීමත් සමඟ විවිධ හානි කාවඩි නර්තනය ට සිදු වී ඇත.
• 
  
• කාවඩි නර්තනය ගැටලු අවම කිරීමට ගත හැකි ගත හැකි ක්‍රියාමාර්ග සහ කාවඩි නර්තන අනාගතය
• .
• කාවඩි නර්තනය රැකගැනීමට පෙරහැර සංස්කෘතිය රැකගැනීම වැදගත් වේ.
• 
  
• එමෙන්ම මෙවැනි නර්තන ක්‍රම පිළිබඳව දැනුවත් භාවයක් අධ්‍යාපනික වශයෙන් හෝ ජනතාවට ලබාදීම වැදගත්ය.
• 
  
• ආර්ථිකමය වශයෙන් රටට විදේශ විනිමය වැදගත් සංකල්පයක් වෙන නිසා මෙවන් නර්තන අංග පිළිබඳව වෙබ් අඩවි හරහා හෝ ජාත්‍යන්තරය දැනුවත් කිරීම වැදගත් වේ.
• 
  
• කාවඩි නර්තනයේ චලන, සංගීතය වැනි කාරණා පිළිබඳ අධ්‍යනයන් සිදු කොට කාවඩි නර්තනය අනන්‍යතාවයන් ට හානි නොවන පරිදි ඒවායෙහි නව ප්‍රවණතාවයන් හඳුනා ගැනීම වැදගත් වේ.
• 
  
• එවිට කාවඩි නර්තන අනාගතය පිළිබඳ බලාපොරොත්තු තැබිය හැකි සේම පවතින අද තත්වයට වඩා කාවඩි නර්තනයේ වෘත්තිමය භාවයක් අනාගතයේ දී ඇති කරගැනීමට හැකි විය හැකිය
•